Feeds:
પોસ્ટો
ટિપ્પણીઓ

Posts Tagged ‘Wondering’

બ્લોગસ્પોટ પરથી મારા બ્લોગ કોઈ કારણ વગર રિમુવ થઈ ગયા તેનું દુખ હજી છે. કાર્તિકભાઈ મિસ્ત્રીએ બેક અપ લેવાનું જે સૂચન કર્યું છે અને તે માટેની જે ટેકનિકલ વિધિ આપી છે તે ઘણાને ઉપયોગી થઈ પડશે. ખાસ કરીને મારા જેવા બિન-ટેકનિકલ બ્લોગર માટે તો ખરી જ.

બ્લોગસ્પોટ પરથી મારા બ્લોગ કેમ રિમુવ થયા તેનું કારણ હેલ્પ-ગ્રૂપના એક નિષ્ણાતે એવું આપ્યું છે કે બ્લોગનો સ્પામ કે પોર્ન વગેરે માટે દૂરુપયોગ ન થાય તેનું ધ્યાન રાખવા જે રોબોટિક વ્યવસ્થા ગોઠવવામાં આવી છે તે આપમેળે કામ કરતી હોય છે. જેઓ ખરેખર દૂરુપયોગ કરતા હોય છે તેઓ એટલી ચાલાકીથી એ કામ કરતા હોય છે કે તેઓ છટકી ન શકે એવો પ્રયાસ કરવા જતાં નિર્દોષ બ્લોગ પણ તેની ઝપટમાં આવી જતા હોય છે.

જો આવું હોય તો પણ કંઈ ખોટું નથી, પણ જ્યારે આવો કોઈ નિર્દોષ બ્લોગર ફરિયાદ કરે ત્યારે તો તેનું બ્લોગ એકાઉન્ટ ફરીથી કામ કરતું થઈ જવું જોઈએ, પણ એવી કોઈ ફૂલપ્રૂફ વ્યવસ્થા હોય એવું લાગતું નથી. કમ સે કમ મને તો આવો જ અનુભવ થયો છે. વધુ દુખની વાત તો એ છે કે ખરેખર જે બ્લોગ રિમુવ કરી દેવાને લાયક છે, એવા કેટલાક બ્લોગ તો મેં આજે જ બ્લોગસ્પોટ પર જોયા.

આ અનુભવ પછી એટલું સમજાયું કે કાર્તિકભાઈ કહે છે તેમ બેક અપ લઈ રાખવો સારો. 

Advertisements

Read Full Post »

ફિલ્મ “ઓમ શાંતિ ઓમ”નું આ ગીત મને બહુ ગમે છે, પણ બહુ જલદી તે મારા એક બ્લોગનું હેડિંગ બનશે એવી તો કલ્પના જ નહિ. આવું બનવું કંઈ નવી વાત નહિ ગણાતી હોય, પણ મારા માટે તો નવી જ છે… બ્લોગસ્પોટ પર બ્લોગ લખવાવું શરૂ કર્યાની બરાબર મોજ આવવી હજી તો શરૂ થઈ હતી ત્યાં જ તા. ૯મી મેંએ એક મિત્રે ફોન કરીને કહ્યું કે તે મારા બ્લોગ હેઈજ પર ગયો પણ તે ખૂલતું નથી. એવું કઈ રીતે બને? પણ વાત સાચી હતી. હું પણ મારું બ્લોગ પેઈજ ન ખોલી શક્યો. ત્યાં એક મેસેજ હતો કે “આ બ્લોગ રિમુવ કરી દેવાયા છે.” એ પછી ઘણી ખણખોદને અંતે મને એટલી જાણ કરાઈ કે એકાદ દિવસમાં આ અંગે યોગ્ય કરવામાં આવશે.

મારી પાસેથી જાણે કંઈ છીનવી લેવાયું હોય એવું લાગ્યુ. ખરેખર નિરાશ થઈ ગયો. અંતે ધીરજ ખૂટી ગઈ. બ્લોગ લખવાનો આનંદ તો હવે જતો કરવો જ નહોતો. બ્લોગસ્પોટ પર જે બન્યું તે ભૂલીને વર્ડપ્રેસ પર આવી ગયો. દુખ એક જ વાતનું હતું કે જે બ્લોગ લખ્યા હતા તે ગયા, પણ ત્યાં તો પ્રતીક્ષાએ શોધી કાઢ્યું કે તરકશ.કોમ પર મારા બધા બ્લોગ મોજૂદ છે. આભાર તરકશ.કોમનો. બધા બ્લોગ ત્યાંથી મળ્યા એટલે અહીં મૂકી શકાયા છે… ખરેખર નિરાંત થઈ, પણ હજી એ તો સમજાયું જ નથી કે બ્લોગસ્પોટ પર જે બન્યું એ કઈ રીતે બન્યું…

Read Full Post »

મને જુઠ્ઠું બોલતા લોકો ગમતા નથી, એનો અર્થ એવો મુદ્દલ નથી કે હું કદી જુઠ્ઠું નથી બોલતો. જુઠ્ઠું બોલવાની બાબતમાં કોઈ પણ સામાન્ય માણસનું હોય છે એવું જ આપણું છે. પાછા ન પડીએ, પણ કોઈ બિનજરૂરી જુઠ્ઠું બોલે ત્યારે મજા ન આવે. આવા અનુભવો થતા રહેવા એ આજના જમાનામાં કોઈ નવી વાત ન કહેવાય અને કોઈએ તેનાથી વિચલિત પણ ન થવું જોઈએ એ પણ સાચી વાત છે, પણ છેલ્લા એક-બે દિવસમાં થયેલા અનુભવોએ વિચલિત નહિ, તો વિચારતો કરી દીધો છે.

શનિવારે બપોરે ફોન કર્યો તો ઓપરેટરે નામઠામ પૂછ્યા પછી ફરી લાઈન પર આવીને કહ્યું કે સાહેબ મીટિંગમાં છે. સાંજે ફોન કરજો. સાંજે ફોન કરવાને બદલે મંગળવારે બપોરે કર્યો તો ફરી થોડી વાર બાદ ઓપરેટરે કહ્યું, સાહેબ મીટિંગમાં છે અને થોડી વાર પછી બહારગામ જવાના છે.

ઓપરેટરના “સાહેબ” સાથે સારો સંબંધ છે. અને ફોન કોઈ ઉઘરાણી કરવા નહોતો કર્યો. તેમણે ધાર્યું હોત તો બે મિનિટ વાત કરી શક્યા હોત. તેમણે કેમ આવું કર્યું એ વિચારતાં મન ખાટું થઈ ગયું.

લોકો શા માટે જુઠ્ઠું બોલતા હશે એ પ્રશ્ન મારી જાતને પણ પૂછવો છે. જુઠ્ઠું બોલવા અંગે દુનિયાના ડાહ્યા લોકો શું કહે છે તે જોવા પ્રયાસ કર્યો તો જે મળ્યું તે આ રહ્યું :

* ખોટું બોલનારા લોકો હંમેશાં શપથ લેવા તૈયાર હોય છે. — વિટ્ટોરિયો આલ્ફેરી

* સત્ય તો કોઈ મૂરખ પણ બોલી શકે, પણ જુઠ્ઠું સારી રીતે કેમ બોલવું એ માટે તો માણસમાં થોડી અક્કલ જોઈએ. — સેમ્યુઅલ બટલર

* જુઠ્ઠાણું એ જીવનની શરત છે. — ફ્રેડરિક નિત્શે

* જ્યોર્જ વોશિંગ્ટન કરતાં મારા સિદ્ધાંતોનું સ્તર ખૂબ ઊંચું છે. તેઓ જુઠ્ઠું બોલી શક્તા નથી, હું બોલી શકું છું, પણ બોલીશ નહિ. — માર્ક ટ્વેઈન

* એક જૂઠ પૃથ્વીના છ આંટા મારી લે ત્યારે સત્ય હજી પાટલૂન ચઢાવતું હોય છે. — માર્ક ટ્વેઈન

* કોઈ માણસમાં એટલી બધી યાદશક્તિ નથી હોતી કે તે સફળ જુઠ્ઠો બની શકે. — અબ્રાહમ લિંકન

* જુઠ્ઠાણાં વિના માનવજાત હતાશા અને કંટાળાથી ખતમ થઈ જાય. — અનાતોલે ફ્રાન્સ

* હેતુ સહિતનું જૂઠ સૌથી વધુ ખરાબ, પણ સૌથી વધુ ફાયદાકારક હોય છે. — ફિન્લે પીટર

* જુઠ્ઠું બોલવું એ બાળક માટે કુટેવ, પ્રેમી માટે કળા, અપરણિત માટે આશીર્વાદ અને પરણેલા માટે સ્વાભાવિક હોય છે. — હેલન રોલેન્ડ

* જો કોઈએ જુઠ્ઠા તરીકે ઓળખાવું હોય તો તેણે એ માટે પૂરતા પ્રયાસ કરવા જોઈએ. — એ. એ. મિલ્ને

* બોલવું જ ન પડે તેમ હોય તો જુઠ્ઠું ન બોલશો. — લિયો ઝિલાર્ડ

* જો તમારે જુઠ્ઠું બોલવું હોય તો તેનું રિહર્સલ કરી લેજો. જો એ તમને પોતાને જ ગળે ઊતરતું ન હોય તો તે બીજાને ગળે પણ નહિ ઊતરે. — લેરોય “સેચલ” પેઈજ

* જૂઠનો પીછો ન કરશો. તેને એકલું રહેવા દો. તે જાતે જ મૃત્યુ પામશે. — લિમેન બીચર

* એક કહેવત છે : “બાળકો અને મૂરખાઓ હંમેશાં સાચું બોલે છે.” તેનો સાર એ જ કે “મોટેરાંઓ અને ડાહ્યાઓ કદી તે બોલતા નથી.” — માર્ક ટ્વેઈન

* લોકો શિકાર કર્યા પછી, યુદ્ધના સમય દરમ્યાન અને ચૂંટણી પહેલાં બોલતા હોય છે એટલું જુઠ્ઠું કદી નથી બોલતા. — બિસ્માર્ક

Read Full Post »

« Newer Posts